Risale:9. Söz (Kur'an Hattı)
Önceki Risale: Sekizinci Söz ←Sözler → Onuncu Söz: Sonraki Risale
Bu risale hakkında bilgi edinmek için Dokuzuncu Söz sayfasına ve bu risaleyi Latin harfleri ile okumak için Dokuzuncu Söz okuma sayfasına gidin
طوقوزنجى سوز
بِسْمِ اللّٰهِ الرَّحْمٰنِ الرَّحٖيمِ
فَسُبْحَانَ اللّٰهِ حٖينَ تُمْسُونَ وَحٖينَ تُصْبِحُونَ
وَلَهُ الْحَمْدُ فِى السَّمٰوَاتِ وَالْاَرْضِ وَعَشِيًّا وَحٖينَ تُظْهِرُونَ
أى برادر! بندن، نمازڭ شو معيّن بش وقته حكمتِ تخصيصنى صورييورسڭ. پك چوق حكمتلرندن يالڭز بريسنه إشارت ايدرز.
أوت هر بر نمازڭ وقتى، مهمّ بر إنقلاب باشى اولديغى گبى، عظيم بر تصرّفِ إلٰهينڭ آيينهسى و او تصرّف ايچنده إحساناتِ كلّيهِٔ إلٰهيهنڭ برر معكسى اولديغندن، قديرِ ذو الجلاله او وقتلرده داها زياده تسبيح و تعظيم و حدسز نعمتلرينڭ ايكى وقت اورتهسنده طوپلانمش يكوننه قارشى شكر و حمد ديمك اولان نمازه أمر ايديلمشدر. شو اينجه و درين معنايى بر پارچه فهم ايتمك ايچون "بش نكته"يى نفسمله برابر ديڭلهمك لازم...
برنجى نكته
نمازڭ معناسى، جنابِ حقّى تسبيح و تعظيم و شكردر. يعنى، جلالنه قارشى قَولًا و فعلًا ـ﴿سُبْحَانَ اللّٰهِـ﴾ دييوب تقديس ايتمك. هم كمالنه قارشى، لفظًا و عملًا ـ﴿اَللّٰهُ اَكْبَرُـ﴾ دييوب تعظيم ايتمك. هم جمالنه قارشى، قلبًا و لسانًا و بدنًا ـ﴿الْحَمْدُ ِللّٰهِـ﴾ دييوب شكر ايتمكدر.
ديمك تسبيح و تكبير و حمد، نمازڭ چكردكلرى حكمندهدرلر. اوندندر كه، نمازڭ حركات و أذكارنده بو اوچ شى، هر طرفنده بولونويورلر. هم اوندندر كه، نمازدن صوڭره، نمازڭ معناسنى تأكيد و تقويه ايچون شو كلماتِ مباركه، اوتوز اوچ دفعه تكرار ايديلير. نمازڭ معناسى، شو مجمل خلاصهلرله تأكيد ايديلير.
ايكنجى نكته
عبادتڭ معناسى شودر كه: درگاهِ إلٰهيده عبد، كندى قصورينى و عجز و فقرينى گوروب كمالِ ربوبيتڭ و قدرتِ صمدانيهنڭ و رحمتِ إلٰهيهنڭ اوڭنده حيرت و محبّتله سجده ايتمكدر.
يعنى ربوبيتڭ سلطنتى، ناصلكه عبوديتى و إطاعتى ايستر؛ ربوبيتڭ قدسيتى، پاكلگى دخى ايستر كه: عبد، كندى قصورينى گوروب إستغفار ايله و ربّنى بتون نقائصدن پاك و مبرّا و أهلِ ضلالتڭ أفكارِ باطلهسندن منزّه و معلّا و كائناتڭ بتون قصوراتندن مقدّس و مُعرّا اولديغنى؛ تسبيح ايله ـ﴿سُبْحَانَ اللّٰهِـ﴾ ايله إعلان ايتسين.
هم ده ربوبيتڭ كمالِ قدرتى دخى ايستر كه: عبد، كندى ضعفنى و مخلوقاتڭ عجزينى گورمكله قدرتِ صمدانيهنڭ عظمتِ آثارينه قارشى إستحسان و حيرت ايچنده ـ﴿اَللّٰهُ اَكْبَرُـ﴾ دييوب خضوع ايله ركوعه گيدوب اوڭا إلتجا و توكّل ايتسين.
هم ربوبيتڭ نهايتسز خزينهِٔ رحمتى ده ايستر كه: عبد، كندى إحتياجنى و بتون مخلوقاتڭ فقر و إحتياجاتنى سؤال و دعا لسانيله إظهار و ربّنڭ إحسان و إنعاماتنى، شكر و ثنا ايله و ـ﴿الْحَمْدُ ِللّٰهِـ﴾ ايله إعلان ايتسين.
ديمك، نمازڭ أفعال و أقوالى، بو معنالرى تضمّن ايدييور و بونلر ايچون طرفِ إلٰهيدن وضع ايديلمشلر.
اوچنجى نكته
ناصلكه إنسان، شو عالمِ كبيرڭ بر مثالِ مصغّريدر و فاتحهِٔ شريفه، شو قرآنِ عظيم الشانڭ بر تمثالِ منوّريدر. نماز دخى بتون عباداتڭ أنواعنى شامل بر فهرستهِٔ نورانيهدر و بتون أصنافِ مخلوقاتڭ ألوانِ عبادتلرينه إشارت ايدن بر خريطهِٔ قدسيهدر.
دردنجى نكته
ناصلكه هفتهلق بر ساعتڭ ثانيه و دقيقه و ساعت و گونلرينى صايان ميللرى بربرينه باقارلر، بربرينڭ مثاليدرلر و بربرينڭ حكمنى آليرلر. اويله ده؛ جنابِ حقّڭ بر ساعتِ كبراسى اولان شو عالمِ دنيانڭ ثانيهسى حكمنده اولان گيجه و گوندوز دورانى و دقيقهلرى صايان سنهلر و ساعتلرى صايان طبقاتِ عمرِ إنسان و گونلرى صايان أدوارِ عمرِ عالم بربرينه باقارلر، بربرينڭ مثاليدرلر و بربرينڭ حكمندهدرلر و بربرينى خاطرلاتيرلر. مثلا:
فجر زمانى، طلوعه قدر، أوّلِ بهار زماننه، هم إنسانڭ رحمِ مادره دوشديگى آواننه، هم سماوات و أرضڭ آلتى گون خلقتندن برنجى گوننه بڭزر و خاطرلاتير و اونلردهكى شئوناتِ إلٰهيهيى إخطار ايدر.
ظهر زمانى ايسه، ياز موسمنڭ اورتهسنه، هم گنجلك كمالنه، هم عمرِ دنيادهكى خلقتِ إنسان دورينه بڭزر و إشارت ايدر و اونلردهكى تجلّياتِ رحمتى و فيوضاتِ نعمتى خاطرلاتير.
عصر زمانى ايسه، گوز موسمنه، هم إختيارلق وقتنه، هم آخر زمان پيغمبرينڭ ـ(عليه الصلاة والسلامـ) عصرِ سعادتنه بڭزر و اونلردهكى شئوناتِ إلٰهيهيى و إنعاماتِ رحمانيهيى إخطار ايدر.
مغرب زمانى ايسه، گوز موسمنڭ آخرنده پك چوق مخلوقاتڭ غروبنى، هم إنسانڭ وفاتنى، هم دنيانڭ قيامت إبتداسندهكى خرابيتنى إخطار ايله، تجلّياتِ جلاليهيى إفهام و بشرى غفلت اويقوسندن اويانديرر، ايقاظ ايدر.
عشاء وقتى ايسه، عالمِ ظلمات، نهار عالمنڭ بتون آثارينى سياه كفنى ايله ستر ايتمسنى، هم قيشڭ بياض كفنى ايله ئولمش يرڭ يوزينى اورتمسنى، هم وفات ايتمش إنسانڭ بقيّهِٔ آثارى دخى وفات ايدوب نسيان پردهسى آلتنه گيرمسنى، هم بو دارِ إمتحان اولان دنيانڭ بتون بتون قپانمسنى إخطار ايله قهّارِ ذو الجلالڭ جلاللى تصرّفاتنى إعلان ايدر.
گيجه وقتى ايسه، هم قيشى، هم قبرى، هم عالمِ برزخى إفهام ايله، روحِ بشر رحمتِ رحمانه نه درجه محتاج اولديغنى إنسانه خاطرلاتير. و گيجهده تهجّد ايسه، قبر گيجهسنده و برزخ قراڭلغنده نه قدر لزوملى بر ايشيق اولديغنى بيلديرر، ايقاظ ايدر و بتون بو إنقلابات ايچنده جنابِ منعمِ حقيقينڭ نهايتسز نعمتلرينى إخطار ايله نه درجه حمد و ثنايه مستحق اولديغنى إعلان ايدر.
ايكنجى صباح ايسه، صباحِ حشرى إخطار ايدر. أوت شو گيجهنڭ صباحى و شو قيشڭ بهارى، نه قدر معقول و لازم و قطعى ايسه، حشرڭ صباحى ده، برزخڭ بهارى ده او قطعيتدهدر.
ديمك بو بش وقتڭ هر برى، بر مهمّ إنقلاب باشنده اولديغى و بيوك إنقلابلرى إخطار ايتديگى گبى؛ قدرتِ صمدانيهنڭ تصرّفاتِ عظيمهِٔ يوميهسنڭ إشارتيله؛ هم سنوى، هم عصرى، هم دهرى، قدرتڭ معجزاتنى و رحمتڭ هداياسنى خاطرلاتير. ديمك أصل وظيفهِٔ فطرت و أساسِ عبوديت و قطعى بورج اولان فرض نماز، شو وقتلرده لايقدر و أنسبدر.
بشنجى نكته
إنسان فطرةً غايت ضعيفدر. حالبوكه هر شى اوڭا ايليشير، اونى متأثّر و متألّم ايدر. هم غايت عاجزدر. حالبوكه بلالرى و دشمنلرى پك چوقدر. هم غايت فقيردر. حالبوكه إحتياجاتى پك زيادهدر. هم تنبل و إقتدارسزدر. حالبوكه حياتڭ تكاليفى غايت آغيردر. هم إنسانيت اونى كائناتله علاقهدار ايتمشدر. حالبوكه سَوْديگى، اُنسيت ايتديگى شيلرڭ زوال و فراقى، متماديًا اونى اينجيتييور. هم عقل اوڭا يوكسك مقصدلر و باقى ميوهلر گوسترييور. حالبوكه ألى قيصه، عمرى قيصه، إقتدارى قيصه، صبرى قيصهدر.
ايشته بو وضعيتده بر روح، فجر زماننده بر قديرِ ذو الجلالڭ، بر رحيمِ ذو الجمالڭ درگاهنه نياز ايله نماز ايله مراجعت ايدوب عرضحال ايتمك، توفيق و مدد ايستهمك نه قدر ألزم و پشيندهكى گوندوز عالمنده باشنه گلهجك، بلنه يوكلهنهجك ايشلرى، وظيفهلرى تحمّل ايچون نه قدر لزوملى بر نقطهِٔ إستناد اولديغى بداهةً آڭلاشيلير.
و ظهر زماننده كه، او زمان، گوندوزڭ كمالى و زواله مَيلى و يومى ايشلرڭ آوانِ تكمّلى و مشاغلڭ تضييقندن موقّت بر إستراحت زمانى و فانى دنيانڭ بقاسز و آغير ايشلرڭ ويرديگى غفلت و سرسملكدن روحڭ تنفّسه إحتياج وقتى و إنعاماتِ إلٰهيهنڭ تظاهر ايتديگى بر آندر.
روحِ بشر، او تضييقدن قورتولوب، او غفلتدن صيريلوب، او معناسز و بقاسز شيلردن چيقوب قيّومِ باقى اولان منعمِ حقيقينڭ درگاهنه گيدوب أل باغلايهرق، يكون نعمتلرينه شكر و حمد ايدوب و إستعانه ايتمك و جلال و عظمتنه قارشى ركوع ايله عجزينى إظهار ايتمك و كمالِ بى زوالنه و جمالِ بىمثالنه قارشى سجده ايدوب حيرت و محبّت و محويتنى إعلان ايتمك ديمك اولان ظهر نمازينى قيلمق؛ نه قدر گوزل، نه قدر خوش، نه قدر لازم و مناسب اولديغنى آڭلاميان إنسان، إنسان دگل...
عصر وقتنده كه او وقت، هم گوز موسمِ حزينانهسنى و إختيارلق حالتِ محزونانهسنى و آخر زمان موسمِ أليمانهسنى آڭديرر و خاطرلاتديرر. هم يومى ايشلرڭ نتيجهلنمسى زمانى، هم او گونده مظهر اولديغى صحّت و سلامت و خيرلى خدمت گبى نعمِ إلٰهيهنڭ بر يكونِ عظيم تشكيل ايتديگى زمانى، هم او قوجه گونشڭ اُفوله مَيل ايتمسى إشارتيله؛ إنسان بر مسافر مأمور و هر شى گچيجى، بى قرار اولديغنى إعلان ايتمك زمانيدر.
شيمدى أبديتى ايستهين و أبد ايچون خلق اولنان و إحسانه قارشى پرستش ايدن و فراقدن متألّم اولان روحِ إنسان، قالقوب آبدست آلوب شو عصر وقتنده ايكندى نمازينى قيلمق ايچون قديمِ باقى و قيّومِ سرمدينڭ درگاهِ صمدانيهسنه عرضِ مناجات ايدهرك، زوالسز و نهايتسز رحمتنڭ إلتفاتنه إلتجا ايدوب، حسابسز نعمتلرينه قارشى شكر و حمد ايدهرك، عزّتِ ربوبيتنه قارشى ذليلانه ركوعه گيدوب، سرمديتِ الوهيتنه قارشى محويتكارانه سجده ايدهرك، حقيقى بر تسلّئِ قلب، بر راحتِ روح بولوب حضورِ كبرياسنده كمربستهِٔ عبوديت اولمق ديمك اولان عصر نمازينى قيلمق، نه قدر علوى بر وظيفه، نه قدر مناسب بر خدمت، نه قدر يرنده بر بورجِ فطرت أدا ايتمك، بلكه غايت خوش بر سعادت ألده ايتمك اولديغنى؛ إنسان اولان آڭلار.
مغرب وقتنده كه او زمان، هم قيشڭ باشلاماسندن ياز و گوز عالمنڭ نازنين و گوزل مخلوقاتنڭ وداعِ حزينانهسى ايچنده غروب ايتمسنڭ زماننى آڭديرر. هم إنسانڭ وفاتيله بتون سَوْدكلرندن بر فراقِ أليمانه ايچنده آيريلوب قبره گيرمك زماننى خاطرلاتير. هم دنيانڭ زلزلهِٔ سكرات ايچنده وفاتيله، بتون سكنهسى باشقه عالملره گوچمسى و بو دارِ إمتحان لامباسنڭ سوندورولمسى زماننى آڭديرر، خاطرلاتير و زوالده غروب ايدن محبوبلره پرستش ايدنلرى شدّتله ايقاظ ايدر بر زماندر.
ايشته آقشام نمازى ايچون بويله بر وقتده، فطرةً بر جمالِ باقىيه آيينهِٔ مشتاق اولان روحِ بشر، شو عظيم ايشلرى ياپان و بو جسيم عالملرى چويرن، تبديل ايدن قديمِ لم يزل و باقئِ لا يزالڭ عرشِ عظمتنه يوزينى چويروب بو فانيلرڭ اوستنده ـ﴿اَللّٰهُ اَكْبَرُـ﴾ دييوب اونلردن أللرينى چكوب خدمتِ مولا ايچون أل باغلايوب دائمِ باقينڭ حضورنده قيام ايدوب ـ﴿الْحَمْدُ ِللّٰهِـ﴾ ديمكله؛ قصورسز كمالنه، مِثلسز جمالنه، نهايتسز رحمتنه قارشى حمد و ثنا ايدوب اِيَّاكَ نَعْبُدُ وَ اِيَّاكَ نَسْتَعٖينُ ديمكله، معينسز ربوبيتنه، شريكسز الوهيتنه، وزيرسز سلطنتنه قارشى عرضِ عبوديت و إستعانه ايتمك،
هم نهايتسز كبرياسنه، حدسز قدرتنه و عجزسز عزّتنه قارشى ركوعه گيدوب بتون كائناتله برابر ضعف و عجزينى، فقر و ذلّتنى إظهار ايتمكله، سُبْحَانَ رَبِّىَ الْعَظٖيمِ دييوب ربِّ عظيمنى تسبيح ايدوب؛ هم زوالسز جمالِ ذاتنه، تغيّرسز صفاتِ قدسيهسنه، تبدّلسز كمالِ سرمديتنه قارشى سجده ايدوب حيرت و محويت ايچنده تركِ ماسوا ايله محبّت و عبوديتنى إعلان ايدوب، هم بتون فانيلره بدل بر جميلِ باقى، بر رحيمِ سرمدى بولوب، سُبْحَانَ رَبِّىَ الْاَعْلٰى ديمكله زوالدن منزّه، قصوردن مبرّا ربِّ أعلاسنى تقديس ايتمك؛
صوڭره تشهّد ايدوب، اوطوروب بتون مخلوقاتڭ تحيّاتِ مباركهلرينى و صلواتِ طيّبهلرينى كندى حسابنه او جميلِ لم يزل و جليلِ لا يزاله هديه ايدوب و رسولِ أكرمنه سلام ايتمكله بيعتنى تجديد و أوامرينه إطاعتنى إظهار ايدوب و ايماننى تجديد ايله تنوير ايتمك ايچون شو قصرِ كائناتڭ إنتظامِ حكيمانهسنى مشاهده ايدوب صانعِ ذو الجلالڭ وحدانيتنه شهادت ايتمك؛
هم سلطنتِ ربوبيتڭ دلّالى و مبلّغِ مرضياتى و كتابِ كائناتڭ ترجمانِ آياتى اولان محمّدِ عربى عليه الصلاة والسلامڭ رسالتنه شهادت ايتمك ديمك اولان مغرب نمازينى قيلمق نه قدر لطيف، نظيف بر وظيفه، نه قدر عزيز، لذيذ بر خدمت، نه قدر خوش و گوزل بر عبوديت، نه قدر جدّى بر حقيقت و بو فانى مسافرخانهده باقيانه بر صحبت و دائمانه بر سعادت اولديغنى آڭلاميان آدم، ناصل آدم اولابيلير!
عشاء وقتنده كه او وقت، گوندوزڭ اُفقده قالان بقيّهِٔ آثارى دخى غائب اولوب، گيجه عالمى كائناتى قاپلار. مُقَلِّبُ الَّيْلِ وَ النَّهَارِ اولان قديرِ ذو الجلالڭ او بياض صحيفهيى بو سياه صحيفهيه چويرمسندهكى تصرّفاتِ ربّانيهسيله يازڭ مزيَّن يشيل صحيفهسنى، قيشڭ بارد بياض صحيفهسنه چويرمسندهكى مُسَخِّرُ الشَّمْسِ وَ الْقَمَرِ اولان حكيمِ ذو الكمالڭ إجراآتِ إلٰهيهسنى خاطرلاتير. هم مرورِ زمانله أهلِ قبورڭ بقيّهِٔ آثارى دخى شو دنيادن كسيلمسيله بتون بتون باشقه عالمه گچمسندهكى خالقِ موت و حياتڭ شئوناتِ إلٰهيهسنى آڭديرر. هم طار و فانى و حقير دنيانڭ تمامًا خراب اولوب، عظيم سكراتيله وفات ايدوب، گنيش و باقى و عظمتلى عالمِ آخرتڭ إنكشافنده خالقِ أرض و سماواتڭ تصرّفاتِ جلاليهسنى و تجلّياتِ جماليهسنى آڭديرر، خاطرلاتديرر بر زماندر. هم شو كائناتڭ مالك و متصرّفِ حقيقيسى، معبود و محبوبِ حقيقيسى او ذات اولابيلير كه؛ گيجه گوندوزى، قيش و يازى، دنيا و آخرتى، بر كتابڭ صحيفهلرى گبى سهولتله چويرر، يازار بوزار، دگيشديرر. بتون بونلره حكم ايدر بر قادرِ مطلق اولديغنى إثبات ايدن بر وضعيتدر.
ايشته نهايتسز عاجز، ضعيف، هم نهايتسز فقير، محتاج، هم نهايتسز بر إستقبال ظلماتنه طالمقده، هم نهايتسز حادثات ايچنده چالقانمقده اولان روحِ بشر، ياتسو نمازينى قيلمق ايچون شو معنادهكى عشاءده إبراهيموارى لَٓا اُحِبُّ الْاٰفِلٖينَ دييوب معبودِ لم يزل، محبوبِ لا يزالڭ درگاهنه نماز ايله إلتجا ايدوب و شو فانى عالمده و فانى عمرده و قراڭلق دنياده و قراڭلق إستقبالده، بر باقئِ سرمدى ايله مناجات ايدوب بر پارچهجق بر صحبتِ باقيه، بر قاچ دقيقهجق بر عمرِ باقى ايچنده دنياسنه نور سرپهجك، إستقبالنى ايشيقلانديرهجق، موجوداتڭ و أحبابنڭ فراق و زوالندن نشئت ايدن يارهلرينه مرهم سورهجك اولان رحمٰنِ رحيمڭ إلتفاتِ رحمتنى و نورِ هدايتنى گوروب ايستهمك؛
هم موقّةً اونى اونوتان و گيزلهنن دنيايى، او دخى اونوتوب، دردلرينى قلبڭ آغلاماسيله درگاهِ رحمتده دوكوب؛ هم نه اولور نه اولماز، ئولومه بڭزهين اويقويه گيرمهدن أوّل، صوڭ وظيفهِٔ عبوديتنى ياپوب، يوميه دفترِ عملنى حسنِ خاتمه ايله باغلامق ايچون صلاته قيام ايتمك، يعنى بتون فانى سَوْدكلرينه بدل بر معبود و محبوبِ باقينڭ و بتون ديلنجيلك ايتديگى عاجزلره بدل بر قديرِ كريمڭ و بتون تيترهديگى مضرلرڭ شرّندن قورتولمق ايچون بر حفيظِ رحيمڭ حضورينه چيقمق..
هم فاتحه ايله باشلامق، يعنى بر شيئه ياراميان و يرنده اولميان ناقص، فقير مخلوقلرى مدح و منّتدارلغه بدل، بر كاملِ مطلق و غنىِّ مطلق و رحيمِ كريم اولان ربّ العالمينى مدح و ثنا ايتمك؛
هم اِيَّاكَ نَعْبُدُ خطابنه ترقّى ايتمك، يعنى كوچكلگى، هيچلگى، كيمسهسزلگى ايله برابر، أزل و أبد سلطانى اولان مالكِ يوم الدينه إنتسابيله شو كائناتده نازدار بر مسافر و أهمّيتلى بر وظيفهدار مقامنه گيروب، اِيَّاكَ نَعْبُدُ وَ اِيَّاكَ نَسْتَعٖينُ ديمكله بتون مخلوقات نامنه كائناتڭ جماعتِ كبراسى و جمعيتِ عظماسندهكى عبادات و إستعاناتى اوڭا تقديم ايتمك؛
هم اِهْدِنَا الصِّرَاطَ الْمُسْتَقٖيمَ ديمكله، إستقبال قراڭلغى ايچنده سعادتِ أبديهيه گيدن، نورانى يولى اولان صراطِ مستقيمه هدايتى ايستهمك؛
هم شيمدى ياتمش نباتات، حيوانات گبى گيزلنمش گونشلر، هشيار ييلديزلر، برر نفر مِثللو أمرينه مسخّر و بو مسافرخانهِٔ عالمده برر لامباسى و خدمتكارى اولان ذاتِ ذو الجلالڭ كبرياسنى دوشونوب ـ﴿اَللّٰهُ اَكْبَرُـ﴾ دييوب ركوعه وارمق؛
هم بتون مخلوقاتڭ سجدهِٔ كبراسنى دوشونوب، يعنى شو گيجهده ياتمش مخلوقات گبى هر سنهده، هر عصردهكى أنواعِ موجودات، حتّى أرض، حتّى دنيا، برر منتظم اوردو، بلكه برر مطيع نفر گبى وظيفهِٔ عبوديتِ دنيويهسندن أمرِ ـ﴿كُنْ فَيَكُونُـ﴾ ايله ترخيص ايديلديگى زمان، يعنى عالمِ غيبه گوندرلديگى وقت، نهايت إنتظام ايله زوالده غروب سجّادهسنده ـ﴿اَللّٰهُ اَكْبَرُـ﴾ دييوب سجده ايتدكلرى؛
هم أمرِ ـ﴿كُنْ فَيَكُونُـ﴾ دن گلن بر صيحهِٔ إحيا و ايقاظ ايله ينه بهارده قسمًا عينًا، قسمًا مِثلًا حشر اولوب، قيام ايدوب، كمربستهِٔ خدمتِ مولا اولدقلرى گبى، شو إنسانجق اونلره إقتداءً او رحمٰنِ ذو الكمالڭ، او رحيمِ ذو الجمالڭ بارگاهِ حضورنده حيرتآلود بر محبّت، بقاآلود بر محويت، عزّتآلود بر تذلّل ايچنده ـ﴿اَللّٰهُ اَكْبَرُـ﴾ دييوب سجوده گيتمك، يعنى بر نوع معراجه چيقمق ديمك اولان عشاء نمازينى قيلمق، نه قدر خوش، نه قدر گوزل، نه قدر شيرين، نه قدر يوكسك، نه قدر عزيز و لذيذ، نه قدر معقول و مناسب بر وظيفه، بر خدمت، بر عبوديت، بر جدّى حقيقت اولديغنى ألبته آڭلادڭ.
ديمك شو بش وقت، هر برى برر إنقلابِ عظيمڭ إشاراتى و إجراآتِ جسيمهِٔ ربّانيهنڭ أماراتى و إنعاماتِ كلّيهِٔ إلٰهيهنڭ علاماتى اولدقلرندن؛ بورج و ذمّت اولان فرض نمازڭ او زمانلره تخصيصى، نهايت حكمتدر...
سُبْحَانَكَ لَا عِلْمَ لَنَٓا اِلَّا مَا عَلَّمْتَنَٓا اِنَّكَ اَنْتَ الْعَلٖيمُ الْحَكٖيمُ
(↑Sayfa Başı↑)
Önceki Risale: Sekizinci Söz ←Sözler → Onuncu Söz: Sonraki Risale